أقدم أكلة مصرية بالتقلية لما تسافر للسويس وبورسعيد أو كفر الشيخ ستقدم بالجمبرى، ولو سافرت لسوهاج وقنا أو الأقصر هتدوق طعمها المميز مع عصير الليمون والشطه الحمراء.
ولما تروح النوبة وأسوان وإسنا هتلاقيها موجودة طول السنة ناشفة ومتخزنة فى برطمان جوه النملية، وفى ناس بتعملها باللحمة وناس بالفراخ وأوقات شوربة، ثقافات متنوعة، لكن كل الناس بيحبوها بالأرانب.
بيقولو عليها بالصعيدى (شلولو) وبالنوبى (إيتر). انها الملوخية يا سادة، أكلة مصرية 100%.
ما هى أقدم أكلة مصرية
الملوخية أقدم من الكشرى والفول والمسقعة، مصر كلها تعرف طعم الملوخية أكلة مقدسة فى جميع انحاء أم الدنيا مصر.
من الجنوب إلى الشمال، وفى الشرق والغرب، وفى المدن، وفى القرى والأرياف، فى الصحراء وفى السواحل، يأكلها الغنى، والفقير، فهي أقدم أكلة مصرية لكل المصريين، ودائمً الملوخية هى الإختيار الأول فى أى عزومة ومختلف المناسبات.
لو دخلت أى بيت مصرى لازم ولابد وحتماً ستجد (مخرطة الملوخية) سكينة نصف دائرية حادة جدآ بتستخدم فقط فى تقطيع أو خرط أوراق الملوخية، ومع إنها بتستخدم للملوخية فقط.
لكن البنت المصرية وهى بتستعد للزواج وبتشترى جهاز بيتها عمرها ما نسيت تشترى المخرطة وهذا يبين لنا كم هو البيت المصرى عاشق للملوخية.
عمل الملوخية
ماء وملح وثوم وزيت مع أوراق الملوخية، هذه هى المكونات الأساسية، ومع ذلك ليس أى شخص ستجده قادر على ظبط طعم الملوخية، ويجعلك تقول مع أول ملعقة من الملوخية (الله نفسك حلو).
طبق الملوخية فعلآ أكبر مقياس على النفس الحلو فى الأكل، مع إن مكوناتها بسيطة لكن طعمها المميز ليس اى شخص بيقدر يوصله.
بتحتاج فترة طويلة حتى تستطيع طبخ الملوخية، وتطلع معاك بالطعم المظبوط، ولذلك عندما تحب أكل الملوخية كلها من إيد الناس الكبيرة فى السن بيبقى ليهم تجارب وخبرة طويلة مع طبق الملوخية.
وسواء الملوخية كانت بالجمبرى، أو بالفراخ، أو باللحمه، أو بالأرانب، أو حتى ناشفه بتفضل نكهة ومذاق وريحة الملوخية القوية هى الغالبة.
الملوخية
الملوخية بتتزرع فى مصر من قديم الزمان ومصر تعتبر موطنها الأصلى، وطبعآ الجزء القابل للأكل من نبات الملوخية هى الأوراق فقط.
والملوخية مع طعمها الجمبل الممتع أيضاً هى غنية بعناصر غذائية كثيرة، والتي يستفيد منها أجزاء وأعضاء متعددة فى جسمنا منها.
فيتامين A ,C ,E ,B1 ,B2 وبعض من الأملاح المعدنية مثل الحديد والفسفور والكالسيوم والمنجنيز هذا غير المادة المخاطية اللزجه والتى ثبت علمياً إجابيتها على المعدة وعملية الهضم وأجزاء من الألياف.
وأيضاً بتحتوى على أجزاء من البروتين ومادة بيتا كاروتين، بمعنى أصح طبق الملوخية وجبة صحية بكل المقايس للمعدة والجلد والنظر والكولسترول وحاجات أخرى كثير.