ان النضوج العاطفي له الكثير من العلامات ونحن هنا سنذكر عشرين علامة تدل انك شخص ناضج عاطفياً !!! فتابع معي.
كيف تعرف انك شخص ناضج عاطفياً
1- لما تبدأ تدرك ان تصرفات الآخرين المزعجة منبعها هوا الخوف والقلق مش انهم أشخاص سيئين بطبيعتهم زي ما اغلبنا دايماً بيفترض ده بإستسهال، بتبدأ تتخلي عن فكرة انك دايما صح وتتوقف عن رؤية الآخرين علي انهم اما “حمقي او غيلان متوحشة”، الموضوع مش سهل وبيخليك تتخلي عن رؤية الأشياء من منظور ثنائية “اما أبيض او أسود” الساذجة والمريحة للذات، لكنه في نفس الوقت اكتر روعة وإثارة ذهنية وروحية علي المدي البعيد.
2- لما تبدأ تعرف ان افكارك الداخلية مش بالضروري الآخرين خصوصاً الأقرباء ليك يعرفوها بشكل اوتوماتيكي، وانك لازم تعبر عن افكارك ومشاعرك بالكلمات بشكل هادي و واضح كفاية وتتوقف عن الغضب من الآخرين لو مفهموش ده من غير ما تعبر عنه وان تعبيرك ده حق ليهم عليك.
3- لما تدرك بشكل جيد انك في بعض الأوقات بتعك الدنيا وبتغلط، ساعتها هتمتلك الشجاعة انك تعتذر عن أخطائك تجاه الغير.
4- لما تبدأ تكتسب الثقة في نفسك، مش لأنك شخص فائق الروعة، لكن ل إدراكك ان كل الناس الآخرين مهما بان عليهم عكس كدة فهم زيك بالظبط داخليا بنفس درجة الحماقة والخوف، وكلنا بنحاول نصحح ده في حياتنا وان ده مش شئ سئ.
5- لما تلاقي نفسك بتعذر وتسامح ابويك وتدرك انهم لم يجلبوك للحياة لمجرد اهانتك وتعذيبك، هم زيك بشر بيواجهوا ضغوطات ومخاوف الحياة وساعات غصب عنهم بيعنفوك لعدم تمكنهم من السيطرة على نفسهم، هتبدأ تلاقي مشاعر الغضب بتتحول لنوع من الشفقة.
6- لما تبدأ تعرف تأثير ما يسمي ب “الأشياء الصغيرة” علي حالتك وحالات الآخرين المزاجية، حاجات زي هل نمت كويس ولا لأ؟ وهل واكل كويس ولا لأ؟ وهل مازلت تحت تأثير شئ انت شاربه مثلا؟ وهل في مشاكل خارجية اخري بتضغط علي اعصابك حاليا ولا لأ؟ هتلاقي نفسك بتتجنب تدخل في نقاشات وجدالات مع احباءك خصوصاً الا وانت متأكد ان كل منكم شبعان ونايم كويس ومفيش حاجة تانية غير موضوع النقاش ب تؤرقه.
7- لما تبدأ تتخلي عن استبطان وتخزين الزعل من الآخرين، لما تلاقي نفسك متضايق من حد اتكلم معاه وعبرله عن اللي مزعلك منه، لو تفهم ده وتأسف عنه، تسامحه، لو متفهمش ده، بشكل اخر مختلف، تسامحه برضه.
8- لما تتوقف عن الإيمان ب “الكمال”، مفيش شئ كامل، لا أشخاص ولا وظائف ولا علاقات، هتلاقي نفسك بتتبني ما اسماه عالم النفس العظيم “دونالد وينيكوت” ب “جيد بشكل كافي good enough” هتبدأ تعتقد ان اشياء كتير في حياتك قد تكون غير مثالية بشكل محبط، ولكنها في النهاية “جيدة بشكل كافي” .
9- لما تبدأ تتعلم ما في الرؤية التشاؤمية من حكمة، بتبدأ تخفض سقف توقعاتك من أي شئ وكل شئ وده بيخليك شخص اهدي واكتر تسامحا واقل اثارة للجنون.
10- بتبدأ تخد بالك ان كل نقطة ضعف لشخص ما هي مجرد الوجه الآخر لنقطة قوي معينة بتوازنها وبتنبع من نفس المكان، وبدل ما تنظر لنقاط الضعف فقط بتبدأ تبص للصورة كاملة، اه بعض الأشخاص بيبقوا متعجرفين، لكنهم في نفس الوقت دقيقين جدا بشكل مثير للإعجاب، اه بعض الأشخاص فوضويين، لكنهم في نفس الوقت مبدعين فنيا، بتدرك هنا ان مفيش أشخاص كاملين وان كل شخص خليط من نقط القوة والضعف.
11- لما تلاقي نفسك بتقع في شراك الحب بشكل اصعب، الموضوع مش سهل علي الاطلاق، لما كنت اقل نضجا كنت ممكن بسهولة وبشكل لحظي يبقي عندك افتتان ب الآخرين crush، دلوقتي بتلاحظ ان اي حد مهما كانت درجة جاذبيته الخارجية فهوا في النهاية انسان وهيبقي داخليا ملئ بالقلق والفوضي زي اي حد وده هينعكس عليك فبيبدأ يتكون عندك ولاء وحب لما لديك اصلا ومش هتفتتن بسهولة بأي وكل عابر.
12- لما تبدأ تدرك بشكل مفاجئ انك شخص صعب المعشر وزيك زي اي حد مصدر إزعاج للآخرين، بتبدأ تتخلي عن حب الذات بشكل مفرط وتلاقي نفسك لما بتبدأ صداقة او علاقة مع حد بتعرض عليه وبتحذره من عيوبك بدل ما كنت بتصدر صورة جمالية مثالية عن نفسك.
13- لما تبدأ تسامح نفسك علي أخطائك وحماقاتك، بتبدأ تدرك مخاطر جلد الذات بشكل مستمر، بتبدأ تكون صديق لنفسك وتقول “بالطبع انا أحمق، ولكن في النهاية أحمق جدير بالحب!!!”.
14- بتبدأ تدرك انك مهما كبرت ف هيبقي بداخلك ذلك الطفل وان النضوج الحقيقي بيتضمن الاعتراف بده مش العكس، بتلاقي نفسك وقت ظهور الطفل بداخلك مش بتعنفه وتكبته بل علي العكس بتعطف عليه وبتوليه الإهتمام اللي هوا طلبه.
15- بتبدأ تتخلي عن الخطط طويلة الأمد اللي من خلالها بتوعد نفسك تحقق سعادة ذاتية دائمة، بتلاقي نفسك بتفرح بالأشياء السعيدة الصغيرة، بتدرك ان السعادة شئ بيحصل في مدد صغيرة تدوم لدقايق علي اقصي تقدير، بتبدأ تفرح لو يوم واحد عدي بدون مشاكل، بتبدأ تخد بالك من جمال الزهور والسما والنجوم، بيتكون عندك حب لمصادر البهجة الصغيرة.
16- لما تبدأ تتغاضي عما يعتقده الآخرين بيك بشكل عام، بتبدأ تدرك ان عقول وارواح الآخرين هي اماكن مزدحمة ومتلغبطة زيك بالظبط وبتتخلي عن شغفك بتلميع صورتك عند كل واي حد بتقابله، بتعرف ان المهم هوا انك انت واحباءك اللي بجد مرتاحين لكونك انت هوا انت، بتتخلي عن حب السمعة وبتبدأ تهتم ب الحب.
17- لما تبدأ تتقبل نقد الآخرين بصدر أرحب، بتعرف ان مش بالضروري هدفهم اهانتك وانك صح وانهم مخطئين، بتبدأ تخفف من آلياتك الدفاعية وتتقبل فكرة انك عندك أخطاء وبتحاول تشتغل عليها.
18- لما تبدأ تخد حياتك ومشاكلها يوم ب يوم وبعقل صافي وتبطل تتشنج منها بشكل دائم، بتبدأ تتمشي في الهواء الطلق بصفة يومية، من الممكن حتي تتبني حيوان أليف، هم مش شكايين بطبعهم زينا، بتبدأ تعرف وتقدر جمال المجرات البعيدة عننا في قلب السما.
19- لما تبدأ تدرك ما لماضيك الشخصي البعيد من تأثير علي حاضرك وتبدأ تتعامل مع المشاكل اللي بتصدر عن ده، بتدرك ان بسبب طبيعة نشأتك في الطفولة ف انت دايما عرضة للمبالغة في رد الفعل علي اشياء معينة دلوقتي، بتبدأ تتشكك في انطباعاتك الأولي حوالين مواضيع معينة وانك مش دايما احاسيسك الأولي صح.
20- لما تلاقي نفسك في بداية تكوين صداقات بتدرك ان الآخرين مش همهم الأكبر نقاط قوتك، بالعكس الاهم ليهم في الواقع هوا مشاكلك ومخاوفك، بتدرك ان جوهر الصداقة هوا الإحساس بالألفة وان الشخص ميحسش بالوحدة في بحر مخاوفه وآلامه ومن هنا بتبقي صديق أفضل.